Azərbaycan Respublikasının Dövlət Reklam Agentliyində “Ticarət Şəbəkələrinin İnkişafı” İctimai Birliyinin nümayəndə heyəti ilə görüş keçirilib.

Görüşdə Birliyin sədri Araz İmanov, üzv şirkətlərin nümayəndələri, Agentliyin İdarə Heyəti sədrinin müşaviri Elmar Abasov və aidiyyəti struktur bölmələrin rəhbərləri iştirak ediblər.

Müzakirələr zamanı ölkədə açıq məkanda reklam fəaliyyətinin tənzimlənməsi istiqamətində həyata keçirilən islahatlar, bu sahədə tətbiq olunan yeni texnoloji həllər, şəffaflığın artırılması məqsədilə görülən tədbirlər və reklam infrastrukturunun müasir tələblərə uyğunlaşdırılması məsələləri ətrafında fikir mübadiləsi aparılıb. Xüsusilə açıq məkandakı reklam daşıyıcılarının rəqəmsal uçotu, texniki nəzarət mexanizmləri və şəhər mühitinin estetik görünüşünün yaxşılaşdırılması istiqamətində görülən işlər barədə məlumat verilib.

“Ticarət Şəbəkələrinin İnkişafı” İctimai Birliyinin nümayəndələri tərəfindən iri pərakəndə ticarət şəbəkələrinin reklam fəaliyyəti zamanı qarşılaşdığı praktiki məsələlər, o cümlədən yerləşdirmə prosedurları, texniki tələblər, operativlik, vahid yanaşmanın əhəmiyyəti və sahibkarlar üçün daha çevik mexanizmlərin yaradılması ilə bağlı təkliflər səsləndirilib.

Birlik tərəfindən qeyd olunub ki, üzvləri ölkə üzrə minlərlə ticarət obyektini əhatə edən, yüz minə yaxın vətəndaşı məşğulluqla təmin edən və hər gün milyonlarla istehlakçıya xidmət göstərən pərakəndə sektorunun reklam imkanları iqtisadi aktivliyin, istehlakçı məlumatlandırılmasının və rəqabət mühitinin vacib elementidir. Bu baxımdan, açıq reklam sahəsində səmərəli və proqnozlaşdırıla bilən tənzimləmə mexanizmləri xüsusi əhəmiyyət daşıyır.

Görüşdə dövlət–özəl sektor əməkdaşlığının gücləndirilməsi, institusional dialoqun davam etdirilməsi və qarşılıqlı fəaliyyət mexanizmlərinin inkişaf etdirilməsi vacib hesab olunub. Tərəflər gələcəkdə əməkdaşlığın daha da genişləndirilməsi istiqamətində əlaqələrin davam etdirilməsi barədə razılıq ifadə ediblər.

18 mart tarixində Ticarət Şəbəkələrinin İnkişafı İctimai Birliyi Böyük Britaniyanın Azərbaycandakı fövqəladə və səlahiyyətli səfiri Zati-aliləri cənab Fergus Auld OBE-nin ev sahibliyi ilə təşkil olunan qəbul mərasimində iştirak edib.

Tədbirdə pərakəndə ticarət sektoru nümayəndələri və sahibkarlar bir araya gələrək mövcud inkişaf meyilləri və əməkdaşlıq imkanları ətrafında fikir mübadiləsi aparıblar. Birliyin sədri Araz İmanov Səfir və səfirliyin nümayəndələri ilə görüşərək sektorun inkişaf perspektivləri, eləcə də "British Retail Consortium" daxil olmaqla Britaniya tərəfdaşları ilə əməkdaşlıq imkanlarını müzakirə edib.

Birlik nümayəndələri həmçinin biznes təmsilçiləri ilə sektorun əsas çağırışları və birgə təşəbbüslər üçün potensial istiqamətlər barədə fikir mübadiləsi aparıblar.

Xocalı faciəsi xalqımızın yaddaşına həkk olunmuş ən ağır və kədərli səhifələrdən biridir. Bu abidə yalnız xatirə məkanı deyil, həm də ədalətə çağırışın, milli həmrəyliyin və tarixi yaddaşın rəmzidir.

Unutmuruq. Unutdurmuruq.

“PAŞA Holding”in “Business Talks by PASHA Holding” platforması çərçivəsində ilk qapalı dəyirmi masa müzakirələri keçirilib.

Müzakirələrin əsas mövzusu pərakəndə ticarət sektorunda nağdsız ödənişlərin inkişafı olub. Görüşdə həm pərakəndə ticarət sahəsinin korporativ nümayəndələri, həm də dövlət qurumlarının təmsilçiləri iştirak ediblər.

Belə ki, dəyirmi masada ölkənin iri supermarket şəbəkələrinə sahib olan “Azərsun Holdinq”, “Veysəloğlu” Şirkətlər Qrupu, “Avrora” Şirkətlər Qrupu, “Grandmart” və “PAŞA Holding”, eləcə də sözügedən şirkətlər qrupları daxilində fəaliyyət göstərən supermarketlərin rəhbərləri təmsil olunublar.

Bununla yanaşı, müzakirələrdə Azərbaycan Respublikası Baş Nazirinin köməkçisi, Azərbaycan Respublikası İqtisadi Şurasının katibi Fəxri İsmayılov, Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin sədri Elnur Bağırov, Azərbaycan Respublikasının İqtisadiyyat Nazirliyi yanında Dövlət Vergi Xidmətinin rəisi Orxan Nəzərli, həmçinin millət vəkilləri Vüqar Bayramov və Tahir Mirkişili iştirak ediblər.

Dəyirmi masa müzakirəsi “Ticarət şəbəkələrinin inkişafı” İctimai Birliyinin sədri Araz İmanov tərəfindən moderasiya olunub.

Sessiya zamanı qaldırılan bütün məsələlər yekunlaşdırılaraq protokollaşdırılıb və müvafiq qurumlarla paylaşılması üçün hazırlanıb.

20 Yanvar faciəsinin ildönümündə “Ticarət Şəbəkələrinin İnkişafı” ictimai birliyinin heyəti Şəhidlər Xiyabanını ziyarət etmişdir.